Fevralın 6-da Türkiyənin Kahramanmaraş bölgəsində baş vermiş və Hatay başda olmaqla bir sıra vilayətlərdə minlərlə insanın həyatına son qoymuş ağır zəlzələnin ildönümü dərin hüznlə anılır. Bu böyük fəlakət təkcə Türkiyəni deyil, bütün türk dünyasını sarsıtmışdı. Azərbaycan dövləti və xalqı isə ilk andan etibarən qardaş Türkiyənin yanında olub.
Zəlzələdən dərhal sonra Azərbaycan tərəfindən axtarış-xilasetmə qrupları, həkimlər və humanitar yardım karvanları Türkiyəyə göndərildi. Xarici media və beynəlxalq təşkilatlar Azərbaycanın göstərdiyi operativ dəstəyi regionda nümunəvi həmrəylik addımı kimi qiymətləndirdi.
Bu dəstəyin ən simvolik nümunələrindən biri Hatay vilayətində inşa edilən “Azərbaycan məhəlləsi” oldu. Azərbaycan tərəfindən tikilən yaşayış evləri zəlzələdən zərər çəkmiş yüzlərlə ailənin yeni həyat qurmasına imkan yaratdı. Məhəllə müasir şəhərsalma prinsiplərinə uyğun salınaraq sosial infrastrukturla təmin edilib.
Rəsmi açıqlamalarda bildirilib ki, “Azərbaycan məhəlləsi” təkcə fiziki yardım deyil, iki ölkə arasında sarsılmaz qardaşlığın və bir millət, iki dövlət prinsipinin təcəssümüdür. Türkiyə rəsmiləri və beynəlxalq müşahidəçilər bu təşəbbüsü uzunmüddətli dostluğun real nümunəsi kimi dəyərləndiriblər.
Zəlzələnin ildönümündə Azərbaycan ictimaiyyəti faciə qurbanlarının xatirəsini dərin hüznlə yad edir, Türkiyə dövlətinə və xalqına daim rifah, firavanlıq və əmin-amanlıq arzulayır. Azərbaycan dövləti hər zaman olduğu kimi, bu ağır günlərdə də qardaş ölkənin yanında olduğunu bir daha nümayiş etdirir.