Fevralın 3-də Azərbaycan Respublikasının Prezidenti İlham Əliyev və Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan iki ölkənin Silahlı Qüvvələrinin hərbi qulluqçularının iştirakı ilə Əbu-Dabidə təşkil olunan “Sülh Qalxanı – 2026” birgə əməliyyat-taktiki təlimini izləyiblər.
Müxtəlif əməliyyat ssenarilərini əhatə edən təlim yaşayış məntəqəsi, dağlıq ərazi və dəniz mühitində keçirilib. Birgə manevrlər zamanı qanunsuz silahlı dəstələrin aşkarlanaraq zərərsizləşdirilməsi, ələ keçirilmiş gəmi üzərində nəzarətin bərpası, terrorçu qrupların məhv edilməsi və girovların azad olunması üzrə tapşırıqlar icra edilib.
Bununla yanaşı, yaralıların təxliyəsi, yaşayış məntəqələrində ictimai təhlükəsizliyə təhdid yaradan iğtişaş və sabotaj xarakterli fəaliyyətlərin qarşısının alınması, eləcə də yanğınsöndürmə əməliyyatları üzrə praktiki fəaliyyətlər həyata keçirilib. Təlimlərin gedişində hərbi qulluqçuların koordinasiyalı fəaliyyəti və yüksək hazırlıq səviyyəsi diqqət çəkib.
Rəsmi məlumatlara görə, “Sülh Qalxanı – 2026” təliminin əsas məqsədi Azərbaycan və BƏƏ hərbi kontingentlərinin antiterror əməliyyatları üzrə peşə bacarıqlarını təkmilləşdirmək, qarşılıqlı təcrübə mübadiləsini gücləndirmək və regional, eləcə də qlobal təhlükəsizliyə töhfə verməkdir. Xarici hərbi analitiklər bu cür təlimləri strateji tərəfdaşlığın praktik göstəricisi kimi qiymətləndirirlər.
Təlim eyni zamanda iki ölkə arasında müdafiə sahəsində əməkdaşlığın davamlı və uzunmüddətli xarakter daşıdığını nümayiş etdirir.