Naxçıvan Muxtar Respublikasında ağır faciə baş verib. Hadisə ötən gecə şəhərin Nizami küçəsində yerləşən 61 nömrəli yaşayış binasında qeydə alınıb. İlkin məlumatlara görə, Naxçıvan Dövlət Universitetinin Tibb fakültəsinin II kurs tələbəsi Büşra Aksu və Baytarlıq fakültəsinin I kurs tələbəsi Ahmet Kavak yaşadıqları mənzildə cansız halda tapılıb.
Yerinə çağırılan aidiyyəti qurumların apardığı ilkin araşdırma zamanı tələbələrin mənzildə yerləşən su qızdırıcısından sızan qazdan zəhərləndiyi müəyyən edilib. Hadisə zamanı mənzildə hər hansı zorakılıq əlamətinə rast gəlinmədiyi bildirilir.
Türkiyə mətbuatının və rəsmi mənbələrin yaydığı məlumata görə, Büşra Aksu Ordu vilayətinin, Ahmet Kavak isə Mersin vilayətinin nüfusuna qeydiyyatlı olub. Gənc tələbələrin cənazələrinin lazımi prosedurlar başa çatdıqdan sonra Türkiyəyə aparılacağı qeyd edilir.
Hadisə ilə bağlı hüquq-mühafizə orqanları tərəfindən istintaqa başlanılıb. Mənzildə texniki təhlükəsizlik qaydalarının pozulub-pozulmadığı, qaz sızmasının səbəbləri və digər detallarla bağlı araşdırmalar davam etdirilir. Xarici ekspertlərin də daxil olduğu ilkin texniki rəy prosesində su qızdırıcılarının düzgün quraşdırılmamasının ölümcül nəticələrə səbəb ola biləcəyi vurğulanır.
Naxçıvan Dövlət Universiteti və Türkiyənin rəsmi qurumlarının məsələ ilə bağlı yaxın saatlarda açıqlama verməsi gözlənilir. Hadisə həm Azərbaycan, həm də Türkiyə ictimaiyyətində dərin üzüntü ilə qarşılanıb.